Dæmdir fyrir tugmilljarðasvik sýndarfyrirtækis

Málmiðnaðarjöfurinn Viren Rastogi hlaut í morgun níu og hálfs árs fangelsisdóm fyrir fjársvik sem nema um 500 milljónum punda, jafnvirði 75 milljarða króna. Rastogi, sem er einn af ríkustu mönnum Lundúna og var eitt sinn meðal tíu ríkustu Breta af asískum uppruna, sveik peningana út úr breskum bönkum auk Westdeutsche Landesbank og fleiri banka víða um heim.

Ásamt Rastogi voru dæmdir Anand Jain og Gautam Majumdar, samstjórnendur hans í málmiðnaðarfyrirtækinu RBG Resources and Allied Deals, og hlutu þeir átta og hálfs og sjö og hálfs árs dóma.

Svik RBG voru mjög umfangsmikil en um tíma leit út fyrir að starfsemi fyrirtækisins væri mun víðfeðmari en í raun var og stórir viðskiptavinir þess um allan heim skiptu hundruðum. Raunar voru fæstir þeirra þó til.

Í skjóli þessa fengu Rastogi og félagar hans milljarðafyrirgreiðslur í fjölda banka en svikamyllan hrundi síðla árs 2001 þegar einn svikaranna símsendi fyrir mistök fjölda falsaðra bréfa til endurskoðunarfyrirtækisins PricewaterhouseCoopers sem annaðist endurskoðun RBG.

PricewaterhouseCoopers sögðu þegar upp samstarfinu við RBG og sendu bresku kauphöllinni tilkynningu um málið. Hófst þá umfangsmikil rannsókn sem lauk með sakfellingunni í morgun.