Neyðarfundur um olíukreppu skilaði litlu í dag

Gjá hefur myndast milli olíusöluríkja og kaupenda á vesturlöndum vegna deilna um hvað valdi síhækkandi olíuverði á heimsmarkaði. Neyðarfundur leiðtoga olíurframleiðsluríkja og helstu iðnríkja heims um olíukreppuna skilaði litlum árangi í dag.

Olíuverð hefur hækkað um fjörutíu prósent frá áramótum og fór í hundrað og fjörutíu bandaríkjadali á tunnuna um tíma fyrir skömmu. Neyðarfundinn sóttu fulltrúar fjölmargra ríkja og olíufyrirtækja.

Abdullah konungur Sádí Araba tilkynnti að þeir ætluðu að auka framleiðslu í níu komma sjö milljónir olíutunna á dag fyrir lok júlí til að mæta mikilli eftirspurn. Hann hvatti önnur olíuframleiðsluríki til að gera slíkt hið sama. Abdullah konungur bauð milljarða í lán til fátækari ríkja vegna áhrifa hækkandi olíuverðs og lagði til að sjóður þeim ríkjum til stuðnings yrði settur á fót með aðstoð Alþjóðabankans. Hann lagði áherslu á að hækkandi olíuverð væri ekki Sádí Aröbum að kenna.

Fremur sé að sakast við sjálfselska spákaupmenn sem sitji á birgðum og þá sem hert hafi á skattlagningu á olíu.

Þrátt fyrir þetta kenni fjölmagir á OPEC, samtök olíusöluríkja, einvörðungu um þróunina þó samtökin hafi látið markaðinn ráða olíuverði í lengri tíma og reynt að svara aukinni eftirspurn.

Gordon Brown, forsætisráðherra Bretlands, sagði að herða yrði á framleiðslu til að lækka verðið. Þess fyrir utan yrði að hugsa málin upp á nýtt. Upplýsa yrði betur um stöðu olíubirgða í heiminum og kanna betur eftirspurn í framtíðinni.

Olíuframleiðendur yrðu að leggja fé í þróun annarra orkugjafa, þar með talið endurnýtanlegrar orku. Síðan yrðu ríkisstjórnir að vinna saman að því markmiði að gera þjóðir heims síður háðar olíu.

Engin endanlega niðurstaða fékkst á fundinum enda vart búist við því. Sérfræðingar leggja áherslu á að það sem þó hafi komið fram verið vart til að lækka verð strax.