Gengi Fannie Mae og Freddie Mac hrundi

Gengi hlutabréfa í hálfopinberu fasteignalánasjóðunum Fannie Mae og Freddie Mac hrundi um rúm áttatíu prósent við upphaf viðskiptadagsins í Bandaríkjunum í dag. Þetta er nokkurn vegin í samræmi við væntingar eftir að tilkynnt var í gær að stjórnvöld hafi tekið yfir stjórn stjóðanna. Líkt og fram hefur komið hefur forstjórum beggja sjóða verið vísað frá auk þess sem stjórnvöld segja stjórnendur sjóðanna hafa ýkt eiginfjárstöðu þeirra. Ekki mun þó hafa verið um blekkingar að ræða heldur jákvæðar skattafærslur. Þá munu stjórnvöld smám saman bæta hlutafé í báða sjóði og eign hluthafa þeirra því smám saman þynnast út. Þetta er ein viðamesta björgunaraðgerð stjórnvalda í heimi innan fjármálageirans til þessa. Gengi bréfa í Fannie Mae stóð við lokun markaða á föstudag í 7,04 dölum á hlut. Það hefur nú fallið um heil 84,8 prósent og stendur það í 1,07 dölum. Þá stóð gengi bréfa í Freddie Mac í 5,1 dal á hlut við lokun markaða á föstudag. Það hefur fallið um 80 prósent og er nú komið í 1,25 dal á hlut. Gengið gekk lítillega til baka þegar á leið. Dow Jones-hlutabréfavísitalan hækkaði um 1,89 prósent við upphaf dags en Nasdaq-vísitalan um 0,53 prósent.