Úrvalsvísitalan ekki lægri í næstum tvö ár - versti júní í BNA í 80 ár

Júnímánuðurinn sem er að líða er sá versti á bandarískum hlutabréfamarkaði frá því í kreppunni 1930 eftir því sem segir í hálffimmfréttum Kaupþings.

Þar segir einnig að áhættufælni fjárfesta hafi farið vaxandi sem haldist í hendur við slæmar fréttir af gangi efnahagsmála á Vesturlöndum, auknum afskriftum innan fjármálageirans og síhækkandi olíuverði.

„Ísland hefur ekki verið eyland í þessum efnum. Úrvalsvísitalan endaði í nýju lágmarki innan ársins - 4.417 stigum - og hefur ekki verið lægri í tæpan 21 mánuð. Frá áramótum hefur vísitalan fallið um 30% prósent," segir í hálffimmfréttum.