Móðir fórnarlambs hvetur til varúðar gagnvart netinu

Alvarleg kynferðisbrot Anthony Lee Bellere gegn þremur stúlkum á aldrinum 12- 16 ára sem framin voru á árunum 2005 til 2006 eiga það öll sameiginlegt að hafa byrjað á netinu.

Anthony, sem er á fimmtugsaldri, stundaði það um langt skeið að fara um netið, finna ungar stúlkur og stofna til samskipta við þær undir því yfirskini að hann væri hinn 18 ára gamli Maggi.

Anthony hefur fyrst og fremst notað msn samskipaforrritið fyrir þessa iðju. Á msn hefur hann notast við netföngin reykur1@hotmail.com, ussuss1@visir.is og ussuss4@visir.is, að því er fram kemur í dómi héraðsdóms sem féll í dag.

Vísir hefur heimildir fyrir því að stúlkurnar sem Anthony hafi sett sig í samband við með þessum hætti og undir þessu yfirskini sé miklu fleiri en þær þrjár sem hann var dæmdur fyrir að brjóta gegn í dag.

Í gegn um msn forritið hefur Anthomy svo komist yfir símanúmer stúlkna og jafnvel heimilisföng.

Í dómnum kemur fram að brot Anthony gegn stúlkunum þremur hafi verið alvarleg, skipulögð og yfirveguð. Hann hafi ýmist nauðgað þeim, misnotað eða miðsboðið. Brotavilji hans hafi verið einbeittur og ákveðinn.

Þess má geta að Anthony á að baki langan sakaferil. Hann hefur alls hlotið 25 refsidóma og fengið fyrir þá alls um 11 ára óskilorðsbundna fangelsisvist.

Eftir að hafa unnið traust stúlknanna með reglulegum samskiptum sótti hann stíft að stúlkunum að hitta þær í eigin persónu. Í tveimur tilvikum tókst það með skelfilegum afeliðingum fyrir þær stúlkur sem um ræðir.

Móðir annarar þeirra sagði í samtali við Vísi eftir að dómur féll í málinu í dag að mál líkt og þetta undirstriki hversu berskjölduð börn geti verið, jafnvel á sínu eigin heimili. Kynferðisafbrotamenn noti netið sífellt meira til að sæka að börnum og mikilvægt sé að standa vaktina vel.

Hún vill brýna fyrir foreldrum að leyfa börnum ekki að vera eftirlitslausum á netinu.