Fjárfestingarsjóður frá Katar stefnir á hlut í Credit Suisse

Fjárfestingarsjóðir sem njóta stuðnings ríkisstjórnarinnar í Katar eru að íhuga kaup á um fimm prósenta hlut í svissneska bankanum Cretid Suisse, einum stærsta banka í Evrópu. Frá þessu er greint í The Sunday Telegraph í dag. Talið er að sjóðirnir séu tengdir Qatar Investment Authority en félagið er í eigu emírsins í Katar og fjölskyldu hans.

Ef af viðskiptunum verður eru þau enn eitt dæmið um að fjárfestingasjóðir með sterk tengsl við ríkisstjórnir og konungsfjölskyldur kaupi hluti í stórfyrirtækjum. Sjóðir með tengsl við Sameinuðu arabísku furstadæmin, Kína, Dubai og Singapore hafa nýlega keypt stóra hluti í fyrirtækjum á borð við Citigroup, Merryll Lynch, Morgan Stanley og UBS en þessi fyrirtæki eiga það sameiginlegt að hafa farið illa út úr hruninu á bandaríska húsnæðismarkaðinum. Þetta á þó ekki við um Cretit Suisse en bankinn hefur sloppið tiltölulega vel frá þeim hremmingum.

Hin vaxandi áhrif sjóða með tengsl við ríkisstjórnir voru til umræðu á Davos ráðstefnunni í Sviss nú um helgina. Larry Summers, fyrrverandi fjármálaráðherra Bandaríkjanna varaði við þróuninni og mæltist til þess að siðareglum verði komið upp fyrir tilfelli af þessu tagi.