Moody´s breytir horfum fyrir langtímaskuldir FIH í neikvæðar

Lánshæfismatsfyrirtækið Moody's tilkynnti í dag að það hefði breytt horfum fyrir langtímaskuldir FIH Erhvervsbank, dótturfyrirtæki Kaupþings í Danmörku, í neikvæðar en þær voru áður stöðugar. Horfur fyrir skammtímaskuldir eru stöðugar.



Greining Landsbanks fjallar um málið í Vegvísi sínum. Þar segir að FIH var síðast metinn með stöðugar horfur þegar lánshæfismat Kaupþings fyrir langtímaskuldir, fjárhagslegan styrk og skammtímaskuldir var lækkað í A1/C-/P-1 í lok febrúar. Við það tækifæri staðfesti Moody's lánshæfiseinkunn FIH óbreytta, A1/C+/P-1.

Ástæður breytingarinnar eru að sögn Moody's áherslur í rekstri FIH, sem stefnir að því að verða leiðandi fjárfestinga- og fyrirtækjabanki í Danmörku, sem hefur leitt til þess að tekjur verða háðari markaðssveiflum en áður. Þannig vegi sjóðstreymislán og lán til fasteignakaupa þyngra í rekstri bankans en áður.



Moody's vekur einnig athygli á því að þrengingar eru nú í dönsku efnahagslífi, þar á meðal á fasteignamarkaði. Lán til fyrirtækja í fasteignarekstri eða byggingariðnaði nemur um 40% af lánasafni FIH. Þá séu útlán til 20 stærstu skuldunauta bankans um þrisvar sinnum meiri en eigið fé bankans í eiginfjárþætti og lán tengd fasteignum og byggingariðnaði um þriðjungur þeirra. Moody's tekur hins vegar fram að gæði eignasafnsins séu enn mjög góð og bankinn hafi ekki lánað áhættusæknari fasteignafyrirtækjum.