300 starfsmenn fjármálastofnanna handteknir í Bandaríkjunum

Bandaríska alríkislögreglan handtók í dag um þrjúhundruð starfsmenn fjármálastofnana, sem grunaðir eru um að hafa svikið út gríðarlegar upphæðir í fasteignalánum.

Fyrir tveimur árum blómstraði fasteignamarkaðurinn í Bandaríkjunum. Fólk gat eignast þak yfir höfuðið þó það ætti ekki krónu. Mjög auðvelt var að fá fasteignalán. En það var maðkur í mysunni og nú er að koma í ljós að menn beittu miklum blekkingum til að fá lán út á fasteignir.

Ljóst er að fjárfestingabankar á borð við Bear Stearns tóku þátt í blekkingunum, sem urðu til þess að fasteignamarkaðurinn hrundi með þeim afleiðingum að fjármálakreppa varð í Bandaríkjunum, sem hafði svo áhrif á markaði í Evrópu og Asíu.

Alríkislögreglan handtók tvo yfirmenn Bear Stearns fjárfestingabankans í dag og þrjú hundruð aðra starfsmenn fjármálafyrirtækja.

Í frétt New York Times um málið er talið að hér sé um að ræða aðeins toppinn á ísjakanum og ber þetta mál saman við það þegar risaolíufyrirtækið Enron hrundi til grunna vegna fjármálaspillingar.