Maradona gefur lítið fyrir ummæli Butcher

Diego Maradona gefur lítið fyrir þau ummæli sem Terry Butcher lét hafa eftir sér á dögunum. Hann segist ekki skilja afstöðu hans.

Butcher sagði að hann myndi aldrei fyrirgefa Maradona fyrir markið sem hann skoraði með „hendi guðs“ í leik Englands og Argentínu í fjórðungsúrslitum HM 1986 í Mexíkó.

Butcher er aðstoðarmaður George Burley landsliðsþjálfara Skotlands en Maradona er nýráðinn landsliðsþjálfari Argentínu. Þessi lið munu mætast í vináttulandsleik í Glasgow í kvöld.

„Ég skil ekki þessa afstöðu hjá Butcher,“ sagði Maradona. „England varð heimsmeistari eftir að hafa skorað mark í úrslitaleiknum þar sem boltinn fór aldrei yfir línuna. Ég tel það því ekki sanngjarnt að fólk dæmi mig.“

Átti Maradona þar við úrslitaleik Englands og Vestur-Þýskalands á HM 1966 en Geoff Hurst skoraði tvívegis í framlengingu leiksins og England vann leikinn, 4-2.

Fyrra markið kom eftir skot Hurst þegar boltinn hafnaði neðanverðri slánni og skoppaði síðan af grasinu og frá markinu. Síðara markið var einnig umdeilt þar sem áhorfendur voru komnir inn á völlinn þegar að Hurst skoraði markið.

Myndband af markinu umdeilda.