United Airlines segir upp 950 flugmönnum

Það eru fleiri flugfélög en íslensk sem eiga í vandræðum vegna hækkandi eldsneytisverðs því í dag greindu forsvarsmenn bandaríska flugféalgsins United Airlines frá því að þeir myndu segja upp 950 flugmönnum í sumar.

Þær uppsagnir bætast við áætlanir félagsins um að fækka störfum hjá fyrirtækinu um 1600 en félagið hefur einnig lagt um 70 flugvélum vegna hás eldsneytisverðs.

Þess má geta að þetta næststærsta flugfélag Bandaríkjanna hefur um 6.600 flugmenn á sínum snærum. Ekki er langt síðan United Airlines tók upp sérstakt farangursgjald á hverja tösku sem tékkuð er inn en því er ætlað að mæta vaxandi eldsneytiskostnaði