Spillingin innan Siemens nær til 300 starfsmanna

Alls munu 300 starfsmenn þýska iðnaðarrisans Siemens verða kærðir fyrir spillingu í starfi. Um er að ræða stærsta fyrirtækjahneyskli í sögu Þýskalands.

Málið er rekið fyrir dómstól í Munchen og þar var réttað í vikunni yfir fyrrum forstjóra Siemens sem starfað hafði í ýmsum stöðum innan fyrirtækisins síðustu 38 árin. Á þessum tíma hafði hann byggt upp umfangsmikið kerfi til peningaþvættis og mútugreiðslna til væntanlegra viðskiptavina Siemens víða um heiminn.

Rannsókn málsins hófst í fyrra er í ljós kom að Siemens hafði sett rúmlega 40 milljarða kr. inn á grunsamlega reikninga í Liechtenstein og Sameinuðu Arabísku Furstadæmunum. Peningunum var svo ráðstafað þaðan til forstjóra ýmissa símafyrirtækja sem stóðu í viðskiptum við Siemens.

Og þetta er aðeins hluti af þeirri fjármálaspillingu sem um er að ræða. Að sögn ákæruvaldsins í Þýskalandi má reikna með að umfang spillingarinnar sé ekki undir 150 milljörðum kr. og það muni taka meir en ár að komast til botns í málinu.