Olíutunnan í tvöhundruð dollara á næstu árum að mati sérfræðinga

Alvarlegur olíuskortur er handan við hornið og gæti tunnan farið yfir 200 dollara á tunnu að mati sérfræðihópsins Chatham house. Í nýrri skýrslu frá hópnum kemur fram að þrátt fyrir að gert sé ráð fyrir að framleiðsla olíu aukist gæti skorturinn farið að gera vart við sig á næstu fimm til tíu árum. Í skýrslunni segir að næg olía sé enn til, en fyrirtæki og ríkisstjórnir fjárfesti ekki nóg í henni til að tryggja áframhaldandi framleiðslu. Það eina sem gæti komið í veg fyrir olíukreppuna sé algjört hrun á eftirspurn.

„Eini möguleikinn til að komast hjá þessum skorti virðist vera ef að meiriháttar efnahagslægð dregur úr eftirspurn - og það gæti jafnvel bara seinkað vandamálinu," hefur fréttastofa BBC eftir prófessor Paul Stevens höfundi skýrslunnar í The Coming Oil Crunch.

Hann varar við því að það dragi úr olíuframleiðslu, þar sem framleiðslufyrirtækin vilji fremur skila hluthöfum sínum arði en að endurfjárfesta honum í aukinni framleiðslu. Hann segir einnig að aukin "auðlinda þjóðernishyggja" þýði að ríkisstjórnir hindri vöxt opinberra olíufélaga sinna með því að meina erlendum olíufyrirtækjum að taka þátt í uppbyggingu þeirra.

Stevens segir að stjórnvöld þurfi að grípa í taumana vilji þeir afstýra vandanum, auka framleiðslu og lækka olíuverð. Um leið þurfi að styðja olíuútflytjendur og leyfa samtökum olíframleiðsluríkja, Opec, að leggja til í neyðarbirgðir alþjóða orkumálastofnunarinnar.