Þýskaland æ mikilvægara fyrir innfluttar sjávarafurðir

Þýskaland verður æ mikilvægari markaður fyrir innfluttar sjávarafurðir, en erlendir framleiðendur gera sér yfirleitt rangar hugmyndir um neytendur í Þýskalandi, sagði Peter Dill framkvæmdastjóri Deutsche See, á sjávarútvegsráðstenu Glitnis í Osló í vikunni.

Fjallað er um málið á vefsíðunni Intraseafood.com. Þar segir að þýski markaðurinn sé fyrst og fremst ákaflega hefðbundinn, þar sem verð vörunnar skiptir mestu máli, og neytendur hafa minni áhuga á tilbúnum réttum en annars staðar á vesturlöndum.

Hlutfall kvenna á vinnumarkaði er þar mun lægra en víðast á vesturlöndum og nær því sem gerist t.d. í Japan og Suður-Kóreu. Þýskar húsmæður hafa tíma til að elda og hafa ánægju af því.

Neysla sjávarafurða í Þýskalandi eykst með hverju ári, í fyrra var fiskneysla á mann 16 kíló, en 13,7 kíló árið 2004.

Sala á sjávarafurðum í Þýskalandi nemur 2,5 milljónum evra og mest er selt af frosnum afurðum. Deutsche See telur mikla möguleika á vaxandi sölu ferskra og kældra sjávarafurða, segir Dill, en hlutdeild þeirra á markaði er lítil og verður það líklega áfram. Mest selda tegundin var alaska ufsi, með rúman fjórðung heildarveltunnar.