Forseti OPEC segir olíuverðið fara niður í 70 dollara

Chakib Khelil forseti OPEC, samtaka olíuframleiðlsuríkjanna, segir að til lengri tíma vænti hann þess að heimsmarkaðsverð á olíu fari í 70 dollara á tunnuna. Fyrir mánuði gaf forsetinn út yfirlýsingu þess efnis að verðið á olíunni færi í 170 dollara fyrir árslok.

Chakib segir nú í samtali við Bloomberg fréttaveituna að þegar 70 dollara markið náist sé komið jafnvægi á framboð og eftirspurn á olíumarkaðinum.

Matthew Lynn sérfræðingur í olíumálum hjá Bloomberg segir að verðið muni lækka niður í 80 dollara til lengri tíma litið. Slíkt muni bjarga efnahagsmálum heimsins. Verðbólga muni lækka sem geri seðlabönkum kleyft að lækka stýrivexti sem aftur geri almennum bönkum kleyft að auka útlán sín.