Kaupþing skráir indverskan sjóð á AIM markaðinum í London

Kaupþing mun á mánudag skrá indverskan fjárfestingasjóð á AIM markaðinum sem er einn af undirmörkuðum kauphallarinnar í London. Sjóðurinn ber nafnið Infrastructure India og ræður yfir 40 milljónum punda, eða um 6 milljörðum kr. til að byrja með.

Sjóðurinn hefur þegar fjárfest í raforkuveri, tollvegi og járnbrautarstöð á Indlandi. Skráningunni á mánudag er ætlað að afla fjár til frekari verkefna. Ætlunin er að nýta sér þá möguleika sem nú eru á Indlandi en mikill hagvöxtur hefur einkennt efnahagslífið þar á undanförnum árum.

Í frétt um málið á vefsíðunni propertyweek.com segir að Kaupþing sé eitt af fyrstu félögunum sem skráir sjóð af þessu tagi á AIM.

Eignastýring sjóðsins verður í höndum Bridge Capital Realty í Singapore en Kaupþing á 20% hlut í því. Þetta félag sérhæfir sig í verkefnum á indverska markaðinum. Kaupþing mun hinsvegar annast fjárfestingastýringu sjóðsins.