Rússar ætla að liðka til fyrir erlenda fjárfesta

Yfirvöld í Rússlandi ætla að liðka til fyrir erlenda fjárfesta í landinu. Unnið verður að því að takamarka völd og áhrif hins opinbera og styrkja eignaréttinn.

Þessu lofaði Igor Sjuvalov aðstoðarforsætisráðherra landsins í ræðu sem hann hélt á ráðstefnu fyrir erlenda fjárfesta í Pétursborg nú um helgina. Ráðstefna þessi, Economic Forum, er sú stærsta sinnar tegundar í Rússlandi.

Sjuvalov fékk stöðu sína er þeir Putin og Medvedev mynduðu nýja stjórn sína fyrir um mánuði síðan. Hann var áður aðalsamningamaður Rússlands í samskiptum landsins við G8 hópinn.

Sjuvalov sagði hinum erlendu fjárfestum að þegar væri ákveðið að draga úr áhrifum stjórnvalda. "Við ætlum okkur ekki að auka áhrifin eða skrifræðið heldur þvert á móti," segir Sjuvalov.