Ná þarf tökum á olíuverðinu til að forðast alheimskreppu

Orkumálaráðherra Japans segir að iðnríki verði að bregðast við og ná tökum á hækkandi olíuverði ef ekki eigi að verða alheimskreppa.

Hann sagði þetta á fundi átta stærstu iðnríkja heims, sem fer nú fram í Japan. Á föstudag hækkaði verð á olíufati um átta prósent, og hefur ekki hækkað meira á einum degi í aldarfjórðung. Verðið stendur nú í 138 Bandaríkjadölum.

Í gær hvöttu iðnríkin olíuframleiðsluríki til þess að auka framleiðslu sína. Formaður OPEC samtaka olíusöluríkja svaraði með því að segja að engar ákvarðanir yrðu teknar um slíkt fyrr en í fyrsta lagi í september, þegar samtökin funda næst.