Dollarinn sækir í sig veðrið

Bandaríkjadalur hefur verið á mikilli siglingu á síðustu dögum og náði í dag sínu sterkasta gildi gagnvart evru í hálft ár.

Í síðustu viku var styrking dals gagnvart evru sú mesta sem sést hefur á einni viku síðan í janúar árið 2005. Ein evra kostar nú um 1,495 dollara en kostaði um 1,5603 í lok júlí. Þetta kemur fram í Hálf fimm fréttum Kaupþings.

Í fréttum Kauþings segir jafnframt að skiptar skoðanir séu meðal sérfræðinga um hvort Bandaríkjadalur haldi áfram að styrkjast eða hvort um yfirskot sé að ræða.

"Fátt bendir til þess að viðsnúningur hafi átt sér stað í bandarísku hagkerfi og væri nær að tala um að styrking dalsins væri fremur að þakka versnandi horfum í evrópskum hagkerfum. Halli á fjárlögum og vöruskiptum er ennþá gríðarlegur í Bandaríkjunum auk þess sem vaxtastig er lágt vestanhafs.

Á föstudaginn styrktist dalurinn um rúm 2% gagnvart evru sem var mesta styrking hans á einum degi í nærri átta ár. Þetta gerðist eftir að Evrópski seðlabankinn hélt stýrivöxtum óbreyttum í 4,25%."