Tesco finnur fyrir samkeppninni frá Iceland

Þekktasta stórmarkaðakeðja Bretlands, Tesco, finnur nú verulega fyrir samkeppninni við lágvörukeðjur á borð við Iceland og Aldi í Bretlandi. Söluaukningin hjá Iceland á síðustu þremur mánuðum nemur 11% en keðjan er að stórum hluta í eigu Baugs.

Ástæðan fyrir framgangi Iceland og Aldi er fjármálakreppan sem hefur gert það að verkum að neytendur hafa minna fé milli handanna en áður og reyna hvað þeir geta að spara við sig í innkaupum.

Samkvæmt umfjöllun í blaðinu Guardian hefur rannsóknarstofnunin TNS Worldpanel gert könnun sem sýnir mikinn framgang hjá lágvöruverslunum á kostnað þeirra sem eru í dýrari kantinum.

TNS kannaði þriggja mánaða tímabil til enda nóvember. Í ljós kom að söluaukningin var mest hjá Aldi eða eða 25% en næst á eftir kom Iceland með 11% aukningu.

Á móti varð aukningin hjá Tesco 4,3% og þess er getið að markaðhlutdeild þeirra hafi minnkað úr 31,6% í ágúst og niður í 30,9% nú.

Fyrir utan Tesco hafa keðjur á borð við Sommerfield og Waitrose einnig tapað umtalsverðum viðskiptum til Aldi og Iceland.