Leikur Íslands og Írlands verður í kvöld

Yfirgnæfandi líkur eru á því að kvennalandsleikur Íslendinga og Íra fari fram á tilsettum tíma í kvöld klukkan 18:10 á Laugardalsvelli.

Dómari leiksins og eftirlitsmaður skoðuðu völlinn í morgun og gerðu engar athugasemdir við ástand hans.

Talsmaður KSÍ sagði Vísi að fátt benti til annars en að leikurinn færi fram á réttum tíma.

Fyrri leik liðanna á Írlandi lauk með 1-1 jafntefli og því nægir íslensku stúlkunum 0-0 jafntefli eða sigur til að tryggja sér sæti í úrslitakeppni EM á næsta ári.

Miðasala á þennan mikilvægasta leik kvennalandsliðsins frá upphafi hefst á Laugardalsvelli klukkan tólf á hádegi en einnig er hægt að kaupa miða á midi.is. Þúsund krónur kostar á leikinn en frítt er fyrir 16 ára og yngri.