Olíuverð hefur hækkað um 50 prósent frá áramótum

Verð á hráolíu fór í nærri 142 dali tunnan í New York í dag þegar ásókn fjárfesta í hrávörur jókst í kjölfar veikingar Bandaríkjadals.

Fram kemur í Morgunkorni Glitnis að það hafi einnig haft áhrif að olíuneytendur í Asíu kepptust við að kaupa olíu áður en verðið á henni hækkaði enn frekar. Hráolíuverð hefur nú hækkað um tæp 50 prósent á þessu ári og meira en tvöfaldast undanfarna tólf mánuði. OPEC býst við að verðið eigi enn eftir að hækka.

Í Morgunkorninu segir enn fremur að hátt olíuverð auki útflutningskostnað framleiðenda í Asíu til skamms tíma en talsmaður Morgan Stanley bendii á að þetta sé líklegt til að flýta þeirri þróun að asískir framleiðendur reiði sig í auknum mæli á heimamarkaði til lengri tíma. Sú þróun yrði til þess að jafna út ójafnvægi í alþjóðahagkerfinu.