Skammgóður vermir á bandarískum mörkuðum

Hún var ekki langvinn gleðin á hlutabréfamörkuðum í Bandaríkjunum í kjölfar aðgerða Bandaríkjastjórnar til bjargar þarlendum bönkum. Mikið verðfall varð á hlutabréfum í dag og lækkaði Dow Jones vísitalan um 7,87 prósent og er nú 8.577stig.

Í punktum talið reyndist fallið hið mesta í sögunni, eða 733, og vantar aðeins um 125 punkta til þess að vísitalan endi á sama stað og fyrir helgi áður en tilkynnt var um aðgerðirnar. Þá féll Standard og Poor´s vísitalan um níu prósent og Nasdaq um 8,5.

Ástæðan fyrir þessu falli er ótti. Ótti við að aðgerðir stjórnvalda hafi ekki nægt. Þá bárust einnig fregnir af minnkandi neyslu í Bandaríkjunum í september og reyndist þar um hærri tölur að ræða en búist hafði verið við. Þá varaði Ben Bernanke, seðlabankastjóri Bandaríkjanna, við því að hinn mikil óróleiki á lánamörkuðum ógnaði bandarísku efnahagslífi sem heild. Það væri ekki nóg að koma á stöðugleika á fjármálamörkuðum heldur þyrfti húsnæðislánamarkaðurinn einnig að jafna sig en núverandi kreppa er rakinn til falls á þeim markaði í fyrra.