Miðasala Paramount á árinu yfir milljarð dollara

Miðasala kvikmyndafyrirtækisins Paramount á Bandarikjamarkaði það sem af er ári fór yfir einn milljarð dollara í upphafi vikunnar eða sem svarar 84 milljörðum kr.

Það eru einkum myndirnar Iron Man og nýjasta Indiana Jones myndin sem gera það að verkum að Paramount er fyrst bandarískra kvikmyndafyrirtækja vestan hafs að ná milljarðs dollara miðasölu í ár.

Iron Man hefur selt miða fyrir 305 milljónir dollara á árinu og Indiana Jones hefur náð 291 milljón dollara. Auk þess hefur teiknimyndin Kung Fu Panda gert það gott með miðasölu upp á 156 milljónir dollara á síðustu þremur vikum.