Debenhams lengir greiðslufrest til birgja

Breska fataverslunarkeðjan Debenhams hefur sent birgjum sínum þau skilaboð að greiðslufrestur keðjunnar til birja verði 96 dagar. Ástæðan ku vera erfiðarleikar á markaði eftir því sem fram kemur í Sunday Times í morgun.

Debenhams hefur, líkt og önnur smásölufyrirtæki, fundið fyrir samdrætti í sölu á undanförnum mánuðum en rekstur þess hefur verið afar erfiður undanfarin misseri.

Skuldir félagsins nema nú um 160 milljörðum samkvæmt Sunday Times og segja sérfræðingar að ekkert annað sé í stöðunni en að hluthafar Debenhams komi inn með meiri pening. Virði félagsins hefur fallið um rúm 77% frá því að það fór á markað fyrir rétt rúmum tveimur árum.

Unity Investment, sem er í eigu Baugs Group (37,5%), FL Group (37,5%) og Kevins Stanford (25%), á 13,5% hlut í Debenhams.

 Sjá frétt Sunday Times hér.