Enginn vöxtur í farsímasölu á árinu

Sala á farsímum dróst saman um sextán prósent í Evrópu á fyrstu þremur mánuðum ársins. Þetta kemur fram í nýrri úttekt markaðsrannsóknarfyrirtækisins Gartners. Þetta er fyrsti samdrátturinn sem fyrirtækið hefur greint í álfunni síðastliðin sjö ár.

Þrátt fyrir samdráttinn jókst farsímasala á nýmörkuðum um þrettán prósent. Vöxturinn var mestur á Indlandi og í Kína, samkvæmt Gartner.

Fyrirtækið segir lítið framboð á nýjum farsímum í Evrópu skýra samdráttinn auk þess sem langtímasamningar farsímafyrirtækja viðskiptavinum hægara um vik að skipta um síma. Þá hafa neytendur haldið þéttar um budduna en áður upp á síðkastið og dregið mjög úr kaupum á dýrari símum. Sem dæmi féll sala á dýrari gerðum farsíma í Bandaríkjunum um heil fjörutíu prósent á fyrsta ársfjórðungi sé miðað við sama tíma í fyrra.

Gartner reiknar með því að farsímasala muni glæðast á seinni hluta ársins en þá senda fyrirtækin frá sér nýja síma.

Gartner reiknar með því að sala á farsímum muni aukst um tíu til fimmtán prósent á nýmörkuðum á þessu ári og halda meðalsölunni uppi vegna samdráttar á öðrum mörkuðum. Ekki er reiknað með aukningu í farsímasölu á árinu í heild, að mati Gartners.