Arnold lýsir yfir efnahagslegu neyðarástandi í Kaliforníu

Arnold Schwarzenegger ríkisstjóri Kaliforníu hefur lýst yfir efnahagslegu neyðarástandi í Kaliforníu. Kassinn er tómur og skuldirnar gríðarlegar. Arnold hefur af þeim sökum kallað stjórnmálamenn ríkisins saman á sérstakan neyðarfund.

Hallinn á ríkissjóði Kaliforníu er nú 11 milljarðar dollara eða rúmlega 1.500 milljarðar kr. og stefnir í að verða yfir tvöfalt hærri á næstu 19 mánuðum ef ekkert er að gert.

Yfirlýsing Arnold um neyðarástand gefur ráðamönnum í Kaliforníu 45 daga frest til þess að breyta núverandi fjárlögum ríkisins og reyna þannig að bregðast við vandanum. Ef ekkert verður að gert mun Kalifornía verða alveg auralaus í febrúar.

Arnold hefur náð samkomulagi við Demókrata á ríkisþinginu í Kaliforníu um skattahækkanir og niðurskurð á framkvæmdum. Repúblikanar eru hinsvegar alfarið á móti skattahækkunum. Og þar sem Demókratar hafa ekki tilskilinn 63% meirihluta á þinginu til að koma skattahækkunum í gegn þarf að semja um málið.