Bandaríkjamenn boða frekari stýrivaxtalækkun

Ben Bernanke, seðlabankastjóri Bandaríkjanna, er tilbúinn til að boða frekari lækkun stýrivaxta á næstunni dugi fyrri aðgerðir ekki til að snúa efnahagslífinu til betri vegar. Seðlabankinn lækkaði stýrivexti í gær um hálft prósentustig og fóru þeir við það niður í eitt prósent. Seðlabankinn greip meðal annars til þess ráðs í gær, ásamt vaxtalækkuninni, að gera gjaldeyrisskiptasamninga við seðlabanka Brasilíu, Mexíkó, Suður-Kóreu og Síngapúr. Fær hver banki þrjátíu milljarða dala til að slá á gjaldeyrisþurrð í löndunum. Evrópski seðlabankinn og Englandsbanki hafa ótakmarkaða gjaldeyrisskiptasamninga við bandaríska seðlabankann. Stýrivextir vestanhafs fóru síðast í eitt prósent í júní árið 2003 og stóðu í því vaxtastigi í eitt ár. Lækki seðlabankinn stýrivextir frekar til að koma hjólum efnahagslífsins í gang á ný og hliðra hjá alvarlegum afleiðingum fjármálakreppunnar fara þeir í sögulegt lágmark. Bloomberg-fréttaveitan hefur eftir fjármálasérfræðingum að afar ólíklegt sé að bandaríski seðlabankinn hækki stýrivexti í bráð. Af því verði líklega ekki fyrr en í fyrsta lagi árið 2010.