Gagnvirk vefsíða

Seðlabanki Sviss heldur úti vefsíðunni www.iconomix.ch. Vefsíðan er á fjórum tungumálum og hægt er að taka þátt í keppnum á landsvísu í eins konar tölvuleik. Leikurinn líkir eftir því hvernig er að sitja í stól bankastjóra og keppendum er sett fyrir það verkefni að stýra hagkerfi landsins miðað við ákveðnar forsendur. Keppt er milli skóla og hverfa sem skapar uppbyggilega umræðu um efnahagsmál.

Vefsíðan er litrík og lífleg og auðvelt er að fræðast þar um heim hagfræðinnar. Töluvert er af kennslu- og fræðsluefni á síðunni sem er aðgengilegt fyrir kennara og nemendur sem hafa áhuga á því að fræðast um seðlabanka, peninga- og efnahagsmál. Vefsíðan hefur hlotið mikið lof að undanförnu og fengið verðlaun fyrir góða hönnun, tæknilega útfærslu og að styðja við fræðslu um efnahagsmál.