Skilyrði IMF setja íslenskum stjórnvöldum þröngar skorður

Greining Glitnis telur að skilyrði Alþjóðagjaldeyrissjóðsins (IMF) fyrir lánveitingu sinni muni setja íslenskum stjórnvöldum þröngar skorður á næstu misserum.

Fjallað er um málið í Morgunkorni greiningarinnar. Þar segir að vænta megi nákvæmari útlistunar á næstunni á þeim aðgerðum sem íslensk yfirvöld hyggjast ráðast í til endurreisnar á hagkerfinu í samráði við IMF, sem og þeim markmiðum sem fullnægja þarf svo áætlunin gangi eftir. Einnig má gera ráð fyrir að Seðlabankinn tilkynni fljótlega um framkvæmd peningastefnunnar næsta kastið, hugsanlega í næstu viku.

Ákvörðun IMF um að veita Íslandi aðstoð fylgdi fréttatilkynning þar sem helstu drættir áætlunar yfirvalda og sjóðsins voru dregnir upp, auk þess sem spá IMF fyrir ýmsar helstu hagstærðir var birt.

"Ef marka má þann hátt sem hafður var á þegar aðstoð var veitt Ungverjalandi og Úkraínu má búast við að í næstu viku eða þeirri þarnæstu verði birtar frekari viljayfirlýsingar þar sem nánar er farið í saumana á útfærslu þeirra aðgerða sem lagðar eru til í viljayfirlýsingunni sem birt var á dögunum," segir í Morgunkorninu.

"Þau skjöl sem birt hafa verið á vef IMF fyrir löndin tvö innihalda auk heldur þau skilyrði sem þarf að uppfylla svo sjóðurinn greiði út þann hluta lána til þeirra sem ekki hefur þegar verið afhentur. Þessi skilyrði snúa að fyrirkomulagi gjaldeyrismála, framgangi endurskipulagningar í fjármálakerfum, stöðu opinberra fjármála og ýmissa peningalegra stærða í hagkerfinu svo nokkuð sé nefnt.

Verði þau skilyrði sem íslenskum yfirvöldum eru sett í takti við ofangreind skilyrði virðist ljóst að svigrúm þeirra á næstu misserum verður ekki mikið."