Stjórnlaus verðbólga ógnar Íslandi segir Bloomberg

Úkraína, Víetnam, Ungverjaland og Ísland eru í upptalningu viðskiptavefjar Bloomberg á þeim löndum þar sem fjárhagslegum stöðugleika er ógnað af stjórnlausri verðbólgu og síhækkandi eldsneytisverði. Vefurinn ber alþjóðlega matsfyrirtækið Standard & Poor's fyrir þessum upplýsingum.

Einnig segir Bloomberg að mörg asísk fyrirtæki berjist í bökkum og þá sérstaklega þau sem treysti að miklu leyti á fjármagn til að halda úti rekstri sínum, svo sem flugfélög. Þannig hafi Oasis Hong Kong Airlines verið leyst upp á fimmtudaginn eftir að félagið sligaðist undan rúmlega tíu milljarða króna skuldahala.

Fjárfestingasjóðir um allan heim hafa að sögn Bloomberg tapað að meðaltali 1,9 prósentum eigna sinna á þessu ári eftir að síðasta ár færði þeim meðalgróða upp á 7,1 prósent. Til langs tíma litið hafi fjárfestingar í Asíu skilað mestum gróða og verið hagstæðari en norðuramerískar og evrópskar fjárfestingar síðasta árið.