Gott ár hjá eBay

Bandaríska netfyrirtækið eBay, sem meðal annars rekur samnefndan uppboðsvef, netsímaþjónustuna Skype og greiðsluvefinn PayPal, skilaði 1,67 milljarða dala hagnaði á nýliðnu ári. Þetta jafngildir 116,8 milljörðum íslenskra króna sem er 24 prósenta aukning frá árinu á undan.

Í tilkynningu frá fyrirtækinu segir að helsta ástæðan fyrir aukningunni sé góður árangur í kjarnastarfsemi fyrirtækisins yfir hátíðirnar.

Talsverð aukning varð á flestum þáttum eBay, að sögn Megs Whitman, forstjóra fyrirtækisins. Mest varð aukningin hjá Skype á árinu en notendur netsímaþjónustunnar voru 171 milljón talsins í fyrra sem er 129 prósenta fjölgun á milli ára. Þrátt fyrir þetta kom fram á símafundi með fjárfestum eftir að uppgjörið var kynnt í síðustu viku að tekjuaukningin hjá Skype-hluta eBay væri ekki eins mikil og vonir stóðu til.

Niðurstaðan er engu að síður langt umfram væntingar greinenda, sem reiknuðu með að viðskiptavinum Skype myndi einungis fjölga um fjórtán prósent á milli ára. Hefðu þær spár gengið eftir væru notendurnir 81,8 milljónir talsins.