Ríkisstjórnin missir þingmeirihluta samkvæmt könnun Gallup

Ríkisstjórnin missir þingmeirihluta sinn samkvæmt niðurstöðum síðustu raðkönnunar Gallup fyrir Morgunblaðið og Ríkisútvarpið, sem gerð var dagana 9. til 10. maí. Þetta kom fram í fréttum Ríkssjónvarpsins í kvöld.

Samkvæmt könnuninni fær Sjálfstæðisflokkurinn 38,4% og bætir heldur við sig á lokasprettinum. Hann fengi þá 25 þingmenn. Fylgi Framsóknarflokksins dalar hins vegar á ný og mælist nú 10,3%. Þetta er sama fylgi og hann mældist með í könnun sem var gerð fyrir Stöð tvö og birt var í kvöld. Hann fengi þá sex þingmenn. Samanlagt eru þetta 48,7% og myndi það skila stjórnarflokkunum 31 þingmanni.

Úrtakið þessa tvo daga var 1194 manns og var svarhlutfall 63,7%.