Hamilton féll úr leik

Úrslit í Formúlunni munu ekki ráðast fyrr en í lokakeppninni eftir að Lewis Hamilton féll úr keppni í Kína í morgun.

Hamilton var með örugga forystu þar til um miðbik keppninnar að dekk hans fóru að gefa sig. Í stað þess að kalla Hamilton inn á viðgerðarsvæðið hélt hann áfram að keppa á nánast ónýtum dekkjum. Það varð honum að falli.

Kimi Raikkönen á Ferrari kom fyrstur í mark en hann steig ekki feilspor alla keppnina. Fernando Alonso, McLaren, varð annar og Felipe Massa, Ferrari, þriðji.

Munurinn á Hamilton og Alonso er nú fjögur stig, Bretanum í vil, sem þýðir að Hamilton nægir annað sætið í lokakeppninni í Brasilíu.

Keppnin var í raun grútleiðinleg fyrstu 30 hringina. Hamilton hélt sinni stöðu í fyrsta sæti og virtist enginn ætla að ógna honum. Raikkönen var annar, Massa þriðji og Alonso fjórði.

Svo um miðbik keppninnar gerðist eitthvað alvarlegt hjá Hamilton. Dekkin hans voru algerlega uppétin og missti hann fljótlega Raikkönen fram úr sér.

En þá tók við einhverjir furðulegustu hringir ársins. Hamilton hélt áfram og leyfði Alonso að éta upp forskotið, allt að átta sekúndur á hring.

Alonso hafði þarna tekið fram úr Massa sem var kominn á þurrdekk en þá byrjaði einmitt að rigna á nýjan leik.

Loksins þegar Hamilton ætlaði að koma inn á viðgerðarsvæðið dundi ógæfan yfir. Hann missti stjórn á bílnum á fráreininni og rann út í möl. Dekkin voru orðin algerlega slétt og var bíllinn pikkfastur í grunnri möl. Ótrúleg sjón.

Það var einnig með ólíkindum að Hamilton væri ekki löngu búinn að fara inn á viðgerðarsvæðið til að fá ný dekk.

Þar með var ljóst að úrslit í stigakeppni ökuþóra ráðast ekki fyrr en í lokakeppninni sem fer fram í Brasilíu eftir tvær vikur.

Nú var hætt að rigna og Massa óx ásmegin á þurrdekkjum sínum. Alonso og Raikkönen skiptu einnig yfir á þurrdekk en Alonso náði að halda forystunni á Massa en naumlega þó.

Forysta Raikkönen á Alonso þegar um 20 hringir voru eftir voru um tíu sekúndur en þar sem að Hamilton féll úr leik hafði hvert stig sem Alonso gat unnið mikla þýðingu. Hann reyndi því eins og hann gat að saxa á forystu Raikkönen.

En sá finnski hélt sínu striki allt til loka og er nú sjö stigum á eftir Hamilton í stigakeppninni. Raikkönen á því enn fræðilegan möguleika á því að verða heimsmeistari.

Þá má einnig minnast frábærs árangurs Toro Rosso í keppninni og þá sér í lagi Þjóðverjans Sebastian Vettell. Hann hóf keppnina í sautjánda sæti en tók aðeins eitt viðgerðarhlé alla keppnina sem skilaði honum í fjórða sætið.

Liuzzi náði einnig frábærum árangri og skilaði sér í sjötta sætið.

Úrslit keppninnar:

1. Kimi Raikkönen, Ferrari

2. Fernando Alonso, McLaren

3. Felipe Massa, Ferrari

4. Sebastian Vettell, Toro Rosso

5. Jensen Button, Honda

6. Vitantonio Liuzzi, Toro Rosso

7. Nick Heidfeld, BMW

8. David Coulthard, Red Bull

Staða efstu manna í stigakeppni ökuþóra:

1. Lewis Hamilton, McLaren - 107 stig

2. Fernando Alonso, McLaren - 103 stig

3. Kimi Raikkönen, Ferrari - 100 stig

4. Felipe Massa, Ferrari - 86 stig