Viðskipti erlent

Frekara tap vegna fasteignalána

 

Bandaríski fjárfestingabankinn Merrill Lynch gerir ráð fyrir því að bankinn skili tapi á þriðja ársfjórðungi vegna tapaðra fasteignalána í Bandaríkjunum. Gangi spáin eftir verður þetta í fyrsta sinn sem bankinn skilar tapi í sex ár.

Tap bankans í tengslum við afskriftir svokallaðra bandarískra undirmálslána, sem einstaklingar með litla greiðslugetu fá í Bandaríkjunum, nemur 5,5 milljörðum dala, jafnvirði rúmra 335 milljarða íslenskra króna.

Áður en niðursveifla í tengslum við fasteignalánin skall á fjármálamarkaði seint í júlí var gert ráð fyrir því að bankinn myndi skila hagnaði upp á 1,43 dali á hlut á fjórðungnum. Nú er hins vegar reiknað með að tapið nemi allt að 50 sentum á hlut, sem er talsverður viðsnúningur frá fyrri spá.

 

Það er fjarri að Merrill Lynch sé eini bankinn vestanhafs til að verða fyrir skakkaföllum af völdum tapaðra fasteignaútlána. Hinir bankarnir eru Citigroup, Credit Suisse og UBS.

Fjármálasérfræðingar segja í samtali við breska ríkisútvarpið í dag að líklega eigi enn fleiri bankar og fjármálastofnanir eftir að greina frá verri afkomu vegna vandamála tengdum bandarískum fasteignalánamarkaði.

Erlent Fréttir Viðskipti


Mest lesið


Fleiri fréttir

Sjá meira


×

Mest lesið