Alcatel-Lucent í vandræðum

Gengi bréfa í fransk-bandaríska símtækjaframleiðandanum Alcatel-Lucent féll um rúm níu prósent á hlutabréfamarkaði í dag eftir að fyrirtækið sagðist gera ráð fyrir talsvert verri afkomu en horfur voru á vegna minni tekna og erfiðleika við samruna Alcatel við Lucent.

Þetta jafngildir því að samstæðan hafi horft á 1,5 milljarða evra, jafnvirði rúmra 133 milljarða íslenskra króna, gufa upp úr bókum félagsins.

Auk minni sölu í ár hefur samruni Alcatel og bandaríska símtækjaframleiðandans Lucent, sem Alcatel keypti í fyrra, gengið mun verra en vonast var en greinendur segja stjórnendur fyrirtækjanna standa frammi fyrir miklum erfiðleikum. Þeir virðast svo miklir, að fyrirtækið segir kostnaðinn sem komið hafi til vegna samrunans lenda harkalega niður á afkomu símtækjaframleiðandans á árinu.

Í ofanálag segja stjórnendur fyrirtækisins samkeppnina á símtækjamarkaði afar harða og hafi það neyðst til þess að lækka verð á vörum sínum til að blása lífi í söluna.