Lækkun í Evrópu og Asíu

Gengi hlutabréfa í Evrópu og Asíu lækkaði nokkuð á fjármálamörkuðum í álfunum í morgun. Þetta er í takt við lækkun á bandarískum hlutabréfamörkuðum í gær vegna samdráttar á bandarískum fasteignamarkaði og verri lausafjárstöðu fjármálafyrirtækja. Óttast er að samdrátturinn geti leitt til þess að hagvöxtur í Bandaríkjunum dragist saman vegna þessa.

Nikkei-vísitalan í Japan lækkaði um 1,69 prósent við lokun markaða í Japan í morgun en Hang Seng-vísitalan í Hong Kong lækkaði um 1,47 prósent. Þá hefur FTSE-vísitalan í Bretlandi sömuleiðis lækkað lítillega, eða um 0,18 prósent það sem af er dags. Hin þýska Dax-vísitalan hefur lækkað um 0,54 prósent en hin franska Cac-40 um rétt rúm 0,2 prósent.

Kauphallir á Norðurlöndunum hafa ekki farið varhluta af lækkuninni.. Sem dæmi hefur C20 vísitalan í kauphöllinni í Kaupmannahöfn lækkað um 0,4 prósent í dag. Öðru máli gegnir hins vegar um vísitöluna í Svíþjóð en hún hefur hækkað um 0,2 prósent.

Gengi hlutabréfa í Bandaríkjunum lækkaði í gær eftir að væntingarvísitalan bandarískra neytenda féll á milli mánaða. Þeir eru nú svartsýnni en áður um horfur í efnahagsmálum vegna stöðunnar á bandarískum fasteignamarkaði. Óttast er að erfiðara aðgengi að fjármagni og hærra vaxtaálag á neytendur geti orðið til þess að þeir haldi að sér höndum og dragi úr einkaneyslu. Tölur um einkaneyslu er stór liður í bandarískum hagvaxtartölum og því er óttast að afleiðingarnar geti skilað sér í minni hagvexti en reiknað var með.