Fyrsta BMW kraftmílan háð á morgun

Farið verður í fyrstu BMW kraftmíluna á kvartmílubrautinni í Kaplahrauni, laugardaginn 14 júlí næstkomandi. Slík kraftmíla hefur ekki verið háð hér á landi áður, og þarna er markmiðið að mynda öruggan og löglegan vettvang fyrir unga ökuþóra.

Skipuleggjendur keppninnar eru BMWKraftur, félag áhugafólks um BMW og B&L, umboðsaðili BMW á Íslandi og hafa um 30 BMW bílar verið skráðir til þátttöku. Þar á meðal eru margir af þeim aflmestu hér á landi eins og BMW M5 (E60) sem er 507 hö. Af öðrum keppnisbílum má nefna BMW M5 (E39), sportbílinn Z3 M Roadster og Alpina B3, sem er Alpina breyttur þristur.

Þó að fyrirkomulag keppninnar byggi á hefðbundinni kvartmílu, verður ekki um eiginlega keppni að ræða. Fyrst og fremst er verið að gefa félagsmönnum í BMWKrafti kost á að sýna hvað í bílum þeirra býr á öruggan og löglegan hátt. Jafnframt er kraftmílan hugsuð sem jákvæð hvatning til eigenda hraðskreiðra bíla, að þeir takmarki hraðakstur við þar til gerðar brautir. BMW kraftmílan hefst stundvíslega kl. 11.