SAS selur í flugfélögum

Skandinavíska flugfélagið SAS greindi frá því í dag að það ætli að selja eignahluti sína í þremur flugfélögum í hagræðingarskyni. Hlutirnir eru í Spanair, bmi og Air Greenland. Jafnframt kynnti félagið aðrar hagræðingartillögur sem eiga að spara flugfélaginu 2,8 milljónir sænskra króna, jafnvirði rúmra 25 milljarða íslenskra króna.

Félagið ætlar í kjölfarið að einbeita sér að rekstri Scandinavian Airlines og smærri félögum, Blue 1, Wideroe, airBaltic og Estonian Air.

Jafnframt þessu verður skorið niður í stjórnunarkostnaði auk þess sem höfuðstöðvar flugfélagsins í Stokkhólmi verða fluttar. Ekki liggur þó fyrir hvert þær muni fara.

Gert er ráð fyrir því að hagnaður félagsins aukist við þetta um fjóra milljarða sænskra króna á ári næstu fjögur ár.