Engar kvartanir vegna reykingabanns

Gestir veitinga- og skemmtihúsa létu fæstir á sig fá að þurfa að standa úti í nótt til að fá sér að reykja. Svo virðist sem flestir hafi virt bannið þó fólk sé missátt við það.

Lögreglan á höfuðborgarsvæðinu segir ekki hafa borið á neinum kvörtunum í nótt sem tengdust reykingabanninu sem tók gildi í gær. Flestir veitinga- og skemmtihúsaeigendur hleyptu fólki út á stétt fyrir utan staðina til að reykja en einhverjir höfðu sett upp sér aðstöðu fyrir reykingafólk við staðina. Virði veitinga- og skemmtistaðir ekki reykingabannið er hægt að beita þá dagsektum, dugi þær ekki til að stöðva reykingarnar er hægt að loka stöðunum. Ekki er hægt að beita gestina sjálfa neinum peningasektum.