Samdráttur hjá Yahoo

Hagnaður bandaríska netfyrirtækisins Yahoo nam 142 milljónum bandaríkjadala, rúmlega 9,2 milljörðum íslenskra króna, á fyrsta fjórðungi þessa árs. Þetta er 11 prósenta samdráttur frá sama tíma í fyrra. Afkoman er undir væntingum greinenda. Fyrirtækið barist hart á netmarkaðnum við risann Google.

Á sama tíma fyrir ári nam hagnaður fyrirtækisins 160 milljónum dala, rúmlega 10,4 milljörðum íslenskra króna.

Tekjur fyrirtækisins jukust hins vegar um níu prósent á milli ára og námu 1,18 milljörðum dala, 76,97 milljörðum íslenskra króna.

Breska ríkisútvarpið bendir á að Yahoo hafi nýverið innleitt nýtt tölvukerfi sem vonast er til að komi til með að auka auglýsingasölu fyrirtækisins en það færir Yahoo mestar tekjur. Ekki er gert ráð fyrir að krónurnar fari að koma inn í kassann vegna þessa fyrr en á yfirstandandi rekstrarfjórðungi.