Sólin sleikt

Mér líður eins og nýkjörnum alþingismanni þessa dagana sem auk þess er með laun sem borgarfulltrúi. Nóg til af peningum og tíminn endalaus. Ég er enn að bíða eftir yfirtökunni í Actavis og einnig hvað ég fæ mikið af færeyska bankanum.

Annars er maður bara rólegur og senniega helst þetta frekar stabílt næstu vikurnar. Ég á alla vega engar andvökunæturnar þessa dagana. Mjatla alltaf svolítið inn á erlend bréf. Svíþjóð er heit þessa dagana, fullt af fínum fyrirtækjum og sænska krónan á útsölu. Annars bíður maður eftir uppgjörunum hér heima. Helst að maður horfi á TM, enda líklegt að eitthvað gerist þar.

Ég gæti trúað að Gnúpur ætti eftir að koma þar við sögu og eiga fyrirtækið með FL. Lógíkin á bak við það er að Eyjafjölskyldan gæti verið til í að selja Magga Kristins hlut í félaginu. TM er að einangrast á markaðnum og þarf á liðsmönnum að halda, best að teygja sig í símann og taka nokkrar kúlur í miðstöðinni og leggja sig síðan aftur.

Spákaupmaðurinn á horninu