SAS dæmt fyrir iðnaðarnjósnir í Noregi

SAS flugfélagið á ekki góðar stundir þessa dagana. SAS varð fyrir enn einu áfallinu fyrir helgina þegar dómur gekk gegn því fyrir hæstarétti Noregs. Þar var SAS sakfellt fyrir iðnaðarnjósnir í Noregi.

SAS var dæmt til að greiða skaðabætur upp á tæplega 40 milljónir kr. fyrir að hafa á ólöglegan hátt nýtt sér upplýsingar um fargjöld samkeppnisaðila síns í Noregi, Norwegians, og styrkt þar með stöðu sína í verðstríði milli þessara félaga. Um var að ræða samkeppni á leiðinni Stavanger-Newcastle.

Talsmaður Norwegian segir að félagið sé ánægt með niðurstöðu dómsins þrátt fyrir að hæstiréttur hafi minnkað sektina sem SAS var dæmt í fyrir héraði en þar voru bætrurnar metnar um 100 milljónir kr.

Áður hefur forstjóri Norwegian sagt að ólöglegir viðskiptahættir SAS hafi kostað félag sitt yfir milljarð kr.