Dallas setti met með 15. sigrinum í röð

Dallas Mavericks setti í nótt félagsmet þegar liðið vann 15. sigurinn í röð í NBA deildinni. Dallas lagði Orlando naumlega á heimavelli 92-89 þar sem Dirk Nowitzki skoraði 29 stig, hirti 9 fráköst og gaf 7 stoðsendingar. Dwight Howard skoraði 25 stig og hirti 10 fráköst fyrir Orlando, en Dallas varð í nótt 6. fljótasta liðið í sögu NBA til að ná 50. sigurleiknum í deildarkeppninni.

Boston vann þriðja leikinn í röð með sigri á New Jersey í framlengingu 96-88. Al Jefferson skoraði 32 stig og hirti 18 fráköst fyrir Boston en Vince Carter skoraði 25 stig og hirti 10 fráköst hjá New Jersey.

New York lagði Atlanta 104-100 í framlengdum leik. Stephon Marbury skoraði 38 stig og gaf 9 stoðsendingar fyrir New York en Joe Johnson skoraði 32 stig fyrir Atlanta.

Cleveland burstaði Toronto 120-97. LeBron James skoraði 36 stig fyrir Cleveland en Chris Bosh skoraði 25 stig fyrir Toronto.

Detroit vann nauman útisigur á Memphis 92-89. Chauncey Billups skoraði 19 stig fyrir Detroit en Mike Miller 24 fyrir Memphis.

San Antonio vann öruggan útisigur á grönnum sínum í Houston 97-74 þrátt fyrir að vera án Tony Parker. Tim Duncan skoraði 26 stig fyrir San Antonio en Tracy McGrady skoraði 21 fyrir Houston.

Sacramento lagði Portland 104-96 á útivelli þar sem Kevin Martin skoraði 33 stig fyrir Sacramento en Zach Randolph skoraði 24 stig og hirti 12 fráköst fyrir Portland.

Loks burstaði LA Clippers Indiana 87-64. Jamal Tinsley skoraði 16 stig fyrir Indiana en Corey Maggette skoraði 20 stig fyrir Clippers.