Bjartsýni ríkir í herbúðum Real Madrid

Leikmenn og forráðamenn Real Madrid segja að sjálfstraustið í herbúðum liðsins sé afar gott um þessar mundir og að menn hafi fulla trú á því að liðið geti komið í veg fyrir að Barcelona vinni spænska meistaratitilinn þriðja árið í röð. Sóknarmaðurinn Robinho og Ramon Calderon, forseti félagsins, eru mjög bjartsýnir.

“Við nálgumst Sevilla og Barcelona sífellt og eftir sigurleikinn um helgina höfum við fulla trú á að við getum komist upp fyrir þau áður en tímabilið er á enda,” segir Robinho, en hann skoraði annað mark Real í 2-0 sigri á Osasuna í gær.

Real Madrid er tveimur stigum á eftir toppliði Barcelona og einu stigi á eftir Sevilla, sem er í öðru sæti. “Ef við höldum áfram að spila af þeim krafti sem við höfum verið að gera er ég viss um að við stöndum uppi sem meistarar,” bætti Robinho við en Real varð síðast meistari árið 2003.

“Við höfum sagt það í langan tíma að deildin er galopin og nú hefur það sannast enn frekar. Allt getur gerst á næstu vikum. Vonandi verður heppnin með okkur,” segir Predrag Mijatovic, yfirmaður íþróttamála hjá liðinu.

Ramon Calderon, forseti félagsins, er sama sinnis. “Margir voru búnir að afskrifa okkur í kapphlaupinu um titilinn en núna eru leikmenn með bullandi sjálfstraust og sannarlega tilbúnir í lokasprettinn. Ég er mjög bjartsýnn fyrir okkar hönd,” sagði Calderon.