Shell ætlar að framleiða eldsneyti úr þara

Hollenski olíurisinn Shell hefur ákveðið að fjármagna tilraunir til að framleiða lífrænt eldsneyti úr þara. Hefur Shell stofnað nýtt fyrirtæki, Cellana, með aðsetri á Hawaii-eyjum þar sem tilraunirnar munu fara fram.

Shell mun eiga samstarf við litla opinbera rannsóknarstofu, HR Biopetroleum, á Kona-eyju og í fyrstu er ætlunin að nota þúsund hektara undir ræktun þarans. Í framtíðinni eru svo áfrom uppi um að taka 20 þúsund hektara undir ræktunina.

Þari hefur lengi verið talinn geta orðið uppspretta lífræns eldsneytis. Bandaríkjamenn gerðu tilraunir með vinnsluna í upphafi áttunda áratugarins en hættu svo við á tíunda áratugnum er þeir ákváðu að beina rannsóknarfjármagni yfir í framleiðslu á ethanoli.

Lífrænt eldsneyti er nú 1% af eldsneytisnotkun farartækja í heiminum. Gert er ráð fyrir að með hækkandi olíuverði geti þetta hlutfall orðið tæp 10% árið 2020.