Verð á hveiti hefur aldrei verið hærra

Verð á hveiti hefur aldrei verið hærra og hefur hækkunin auk þess ýtt undir hækkun á öðru korni að því er fram kemur á fréttavef Bloomberg.

Fjallað er um málið í Vegvísi Landsbankans og þar segir að Kellogg og General Mills hafa þegar hækkað verð. Eins ætlar Kikkoman, stærsti framleiðandi á soja sósu í heiminum, að hækka verð í fyrsta skipti í 18 ár. Þessi þróun ýtir undir verðbólgu víða um heim.

Nú nýverið voru birtar verðbólgutölur í Bandaríkjunum fyrir nóvembermánuð sem sýndu mestu mánaðarhækkun vísitölu neysluverðs í tvö ár. Þá jókst verðbólga í Evrópusambandinu í sama mánuði á mesta hraða síðan í maí 2001.