Rasheed Wallace: Það þýðir ekkert að sekta mig

Vandræðagemlingurinn Rasheed Wallace hjá Detroit Pistons hefur sent þau skilaboð til forráðamanna NBA-deildarinnar að það þýði ekkert að sekta sig eða setja sig í leikbann – hann muni ekki breyta leikstíl sínum. Wallace, sem er þekktur fyrir sorakjaft í leikjum Detroit, segist eiga nóg af peningum til að borga sínar sektir.

Wallace fékk sína 16. tæknivillu á tímabilinu gegn Denver í nótt, sem þýðir sjálfkrafa eins leiks bann. “Sekt og bönn skipta mig engu máli. Peningar skipta mig engu, ég á nóg af þeim og þeir munu ekki breyta þeirri persónu og þeim leikmanni sem ég er,” sagði Wallace, en hann hefur einstaklega gaman að því að rífa kjaft við dómara.