Íslenskur Björgólfur

Auðkýfingurinn Björgólfur Guðmundsson sást sitja að snæðingi ásamt Guðmundi Davíðssyni, forstjóra Eimskips á Íslandi, og fleira starfsfólki fyrir­tækisins á matsölustaðnum á Umferðarmiðstöðinni í hádeginu í gær en Björgólfur mun vera þar tíður gestur. Pakkfullt var á staðnum líkt og á þessum tíma dags og gestir af öllum stéttum. Ekki liggur fyrir hvað mönnum fór á milli en heimildir Markaðarins herma að flestir hafi snætt þá þjóðlegu rétti sem í boði eru á Umferðamiðstöðinni alla daga árið um kring: Sviðakjamma, lambakótelettur og plokkfisk. Þeir sem ekki eru jafn gefnir fyrir þessa gómsætu og alíslensku rétti geta svo nýtt sér hlaðborðið.