Merrill Lynch spáir minnkandi álagi

Í nýrri skýrslu um íslensku bankana segja sérfræðingar greiningardeildar alþjóðabankans Merrill Lynch að horfur þeirra hafi batnað þótt enn fylgi þeim meiri áhætta en bönkum af sambærilegri stærð í Evrópu. Er því spáð að tryggingarálag á skuldabréf bankanna (CDS) gæti átt eftir að lækka um 5 til 10 punkta til viðbótar, þótt enn sé nokkuð í land að jafnvægi sé þar náð.

Skýrsla Merrill Lynch í mars markaði upphaf erfiðrar umræðu um íslenskt bankakerfi og efnahagslíf og hafa bankarnir bent á að nokkurs mislesturs á íslenskum aðstæðum hafi gætt í þeirri umræðu, en sami aðalhöfundur, Richard Thomas, er af öllum skýrslum bankans. Í vor og sumar hafa svo bankarnir og stjórnvöld unnið töluvert í að kynna efnahagsmál hér og aðstæður, meðal annars með riti sem hagfræðingarnir Frederic Mishkin og Tryggvi Þór Herbertsson unnu í sumar. Í júlí birti bankinn svo skýrslu númer tvö, þar sem tekið var til greina að bankarnir græddu jafnvel á verðbólgunni, sem og gengislækkun krónunnar þannig að þróunin í hagkerfinu hér væri þeim um margt hagfelld.

Í nýju skýrslunni, sem kemur í kjölfar heimsóknar Thomas og Tolu Alamutu hingað til lands í síðustu viku og kom út á miðvikudag, er mælt með því að fjárfestar taki stöðu með íslensku bönkunum og mælt með kaupum í hluta bréfa þeirra. Er það sagt gert í ljósi þess að stóru bankarnir þrír hafi að mestu lokið við fjármögnun næsta árs. Í skýrslunni er þó eftir sem áður haldið fast við þá skoðun að sérstaða íslensku bankanna og ójafnvægi í hagkerfi íslands kalli á að skuldabréf bankanna beri hærra tryggingarálag en bankar á meginlandi Evrópu.

Skýrsluhöfundar funduðu í heimsókn sinni með fulltrúum viðskiptabankanna þriggja, með Straumi-Burðarási fjárfestingarbanka og með Fjármálaeftirliti og Seðlabanka. Merrill Lynch fjallar í fyrsta sinn um Straum-Burðarás og telur hann eiga nokkuð í land með að verða fjárfestingarbanki að fullu. Merrill Lynch segir fjóra valkosti líklegasta varðandi bankann, að honum verði skipt upp, að FL Group hverfi úr eigendahópnum, að Landsbankinn/Samson hverfi úr bankanum, eða að bankinn verði sameinaður Landsbankanum.