Ferðalangur stóðst ekki læknisskoðun

Japanski kaupsýslumaðurinn Daisuke Enomoto, sem keypti sér farmiða í vor með rússneska geimfarinu Soyuz og stefndi að því að verða fjórði einstaklingurinn til að dvelja í tíu daga í alþjóðlegu geimstöðinni, stóðst ekki læknisskoðun um helgina og fær þar af leiðandi ekki að uppfylla draum sinn.

Fyrirhugað var að Enomoto, sem er 34 ára og fyrrum stjórnar­maður í japanska netfyrirtækinu Livedoor, færi í loftið áleiðis til geimstöðvarinnar um miðjan næsta mánuð.

Talsmaður rússnesku geimvísindastofnunarinnar, Roskosmos, vildi ekki tilgreina nákvæmlega hvað amaði að Enomoto. Annar ferðalangur mun að öllum líkindum fara til stöðvarinnar í hans stað.

Ekkert hefur verið látið uppi um hvort Enomoto fái ferðina endurgreidda en víst þykir að hann hafi pungað út vel yfir milljarði króna fyrir sætið.

Bandaríski auðkýfingurinn Greg Olson, sem var sextugur þegar hann fór til geimstöðvar­innar í október í fyrra, stóðst heldur ekki læknisskoðun í fyrstu. Hann varð af ferðinni í það skiptið en stóðst aðra læknisskoðun og fór að lokum út í geim nokkru síðar en áætlað var.